Act 14 | KYG | STEP | Atiyoki kotegamo afole ai'niya agufa kava'mo huno Aikoniyamu kotegamo afole ai'niye. Polo'e Manamasi'e'mo Yu vaya'ai mono nopi'mo hai'ana alagepa hu'ana ae'ana hakalo hu'ana hapa pai'na'age'apae'mo asole Yu vaya'e alu nofi vaya'mogi'e'mo apakesa afi'a fatago hu'nae.

Acts 14

Apa vekala'mo Aikoniyamu kotegamo u'ana mai'na'a gemae

1 Atiyoki kotegamo afole ai'niya agufa kava'mo huno Aikoniyamu kotegamo afole ai'niye. Polo'e Manamasi'e'mo Yu vaya'ai mono nopi'mo hai'ana alagepa hu'ana ae'ana hakalo hu'ana hapa pai'na'age'apae'mo asole Yu vaya'e alu nofi vaya'mogi'e'mo apakesa afi'a fatago hu'nae. 2 Hu'naya'monanafa mago apakesa afi'a fatago osu'naya Yu vaya'mogimo apa vekala'anife'mo alu nofi vaya'ai apakesa faite'a ali'a he ti'a apate'nae. 3 Apa vekala'moganimo koli osu'ana yatala afina'mo mai'ne'ana Ala kava nefe'mo ava gemo hu'ana ae'ana hakalo hu'ana hapa pai'ana mai'na'ae. Ala kava ne'mo'a ayamufa huno anate'nige'ana no'agaya agufa lokiya aune kava'mo hu'na'ae. Ala kava ne'mo'a ani kavateti'mo fiku hapa maeno ne'apamiya kava'ae'mo lama gemo hane'niye, huno alino apave li'niye. 4 Ani taonifi'mo mai'naya vaya'mo ali'a fako hu'a mago vaya'amogimo Yu vaya'ai ge'apimo afi'nage'apae'mo mago vaya'amogimo apa vekala'ani ge'animo afi'nae. 5 Ani afina'mo Yu vayanagi alu nofi vayanagi apakaete'mo yagai'a ne'apataya vaya'apigi hu'a ge huge afige hute'apae'mo, Anatafauta yafa kayoteti'mo anamagigune, hu'a hu'nae. 6 Apa vekala'moganimo ani gemo afite'anae'mo anaune hetale'ana Lisitiya taonifi'e Nemi taonifi'e'mo ute'anae'mo mago ani taonimo haopale'mo hane'niya ko'mo agi'amo Laikoni kotegamo u'ana mai'ne'anae'mo 7 alagepa faigoko gemo ae'ana hakalo hu'ana hapa pai'na'ae.

Apa vekala'mo Lisitiya taonifi'e Nemi taonifi'e'mo u'ana ali'ya'mo ali'na'a gemae

8 Mago vekamo Lisitiya taonifi'mo mai'niya vekamo aiyala'mo lokiya o'vai'nigeno ka umenitata nosiya vekamo ita'amo'mo alino ate'niya afinateti'mo aiyala'mo hosu'nigeno maime maime e'niye. 9 Ani vekamo mai'neno'ae'mo Polo'a hu'niya gemo afi'nigeno Polo'a ageteno, ali'na alagepa hu'na atesuvafe'mo agesa afino fatago nehiya'mofe'mo afa'a ali'na alagepa hu'na ategauve, huno agesa afiteno aulu haeno ageteno'ae'mo 10 alopa gefati'mo huno'ae'mo, He tika aeka apafe lo, huno ha pai'nigeno'ae'mo malage huno he tino aeno hailo huno ka umenitata hu'niye. 11 Muki vaya'mogimo Polo'a hu'niya kava'mo agete'apae'mo Laikoni kotega vaya'mogi apake'apifati'mo alopa gefati'mo hu'apae'mo, mago gotiganimo vayakana hu'ana afole aite'ana lagaetegamo emi e'ana mai'na'ae, hu'a hu'nae. 12 Manamasife'mo apakai'api goti'apimo agile'mo Susi'ae hu'a agi atete'a Polo'a hogoteno ge nehiya vekamo mai'niya'mofe'mo agi'amo Hemesi'ae hu'a ate'nae. 13 Ani vaya'ai goti'apimo agi'amo Susi mono no'amo taoni haopale'mo hane'nigeno Susitefe'mo mono huno ne'apateya vekamo'a pulumakamo apavalege konali ya'mo alige huteno apavalelino taoni kegi'ya hi'yanale'mo e'niye. Agae'e apakae'e'mo pulumakamo he'a ofalinimo anamite'ana anakaetefe'mo mono hisayafe'mo e'a mai'nae. 14 Manamasi'e Polo'e'mo ani kava'mo agete'anae'mo ohanau'nige'ana kukena'animo ali'ana apake aite'ana ani vaya'ai folagapi'mo nagu nagu hu'ana u'na'ae. 15 Alopa gefati'mo, Na kava higetapa ani agufa kava'mo hugefe nehae. La'agaemo lapakaekana huta'a vayalafatala'mo mai'no'ae. La'agaemo lapa paita'ae'mo, Ani agufa kava'mo ina agufa kava'mo hane'niyanageno lapa o'maegaiyanagi ataletapa Goti'a afa'a mai'niya vekamo'a koku'nanagi ma mopagi solovala aninagi muki ma mopafi'mo hane'niya yanagi koku'nate hane'niya yanagi huno alo hu'niya Gotitegamo viyo, huta'a lapa paiteta'a alagepa faigoko gemo aeta'a hakalo huta'a lapa nepau'ae. 16 Akeya'vilagamo muki afina'mo Goti'a afa'a apakeno apatale'nige'apae'mo apakai'apimo hapau'niya kava'mo hu'naya'monanafa 17 Goti'a mai'niye, hu'a apakesa afisayafe'mo alagepa kava'mo nehiye. Goti'a, ko aiyo, huno nehigeno'ae'mo ko'mo ne'aigeno kanale ne'ya'mo hoyafati'mo alino hageno ate'nige'apae'mo ali'a nete'a apamogaga ne'aiye, hu'ana hapa pai'na'ae. 18 Ani gemo hu'na'a'monanafa muki vaya'mogimo pulumakamo he'a ofalinimo anamigefe'mo hu'nae. Ani kava'mo atalesayafe'mo kana hu'niya'monanafa hapa pai'na'age'apae'mo afa'a atale'nae.

19 Inagi mago Yu vaya'mo Atiyoki taonimo Pisitiya kotegati'e Aikoniyamu taonifati'e'mo e'a ani vaya'mo apakesa fai'a hapa pai'nage'a ge'apimo afite'apae'mo yafa kayoteti'mo Polo'mo amagite'apae'mo, ago fali'niye, hu'a hute'a he'a halauli'a lami'a taoni kegi'ya malagamo atale'nae. 20 Atale'nage'apae'mo apakesa afi'a fatago nehaya vaya'mogimo e'a fai'a vego hu'a ate'a mai'nageno he tino atagi nenuno taonifi'mo havae'niye. Egamo agae'e Manamasi'e'mo Nemi taonifi'mo u'na'ae.

Atiyoki taonimo Siliya kotegamo u'ana mai'na'a gemae

21 Polo'e Manamasi'e'mo Nemi taonifi'mo mai'naya vaya'aife'mo alagepa faigoko gemo ae'ana hakalo hu'ana hapa paite'anae'mo asole vaya'mogi Goti ge'amo alagepa hu'a ne'afiya vaya'mo ali'ana hamale'ana apate'na'ae. Apatale u'ana Lisitiya taonifinagi Aikoniyamu taonifinagi Atiyoki taonifinagi hu'ana mai'na'ae. 22 Goti ge'aleti'mo muki taoni'afi taoni'afi'mo ge'amo ne'afiya vaya'mo ali'ana lokiya vai'ana apatete'anae'mo, Goti ge'ale'mo atafautapa alagi hu'netapa lapakesa afitapa fatago hutapa maiyo. Lusi hanageke ya'mo ne'alitaeke'mo Goti'a ne'yagaiya kote'mo haita maigune, hu'ana ali'ana apaya malemale malemale huli'ana umenitata hu'ana mai'na'ae. 23 Anakaemo muki siosi'ale siosi'ale'mo u'e'a hu'ana nunumu'mo huge ne'ya'mo mosi'ana maige hu'ana mai'ne'anae'mo Goti vaya'ale'mo yagai'a apatesaya vayatama vaya'mo lekana pai'ana apate'na'ae. Apatete'anae'mo Ala kava ne'mo'a alagepa huno yagaino apatesiyafe'mo ali'ana apakesa afi'a fatago nehaya Ala kava ne'mo ayamufa'age vekamo ayapi'mo apatemale apatemale huli'ana umenitata hu'ana mai'na'ae.

24 Pisitiya kotegamo ali'ana atale'u'ana Pamifiliya kotegamo ava'yi hute'ana 25 Pega taonifi'mo Goti ge'amo ae'ana hakalo hu'ana hapa paite'ana u'ana Ateliya taonifi'mo solovala ani'mo hane'niya yategamo hane'nige'ana u'ana ava'yi hute'ana sipifi'mo hai'ana 26 solovala ani'mo lakae'ana halate Atiyoki taonifi'mo e'na'ae. Goti vaya'amogimo ani taonifati'mo hogote'a Goti'a yagaino anatesiyafe'mo ali'a ayapi'mo malete'a ali'a anatage'ana u'ana Goti ali'ya'amo ali'na'ae. Ani ali'ya'amo ago ali'ana hano hute'ana e'na'ae. 27 E'ana Atiyoki taonifi'mo ava'yi hute'ana ge hu'na'age'a e'a ali'a anupa hu'a mai'nage'anae'mo Goti'a anakaeteti'mo muki kava'amo hu'niya kavafe'mo ava gemo hu'ana hapa pai'anae'mo Goti'a mago saufa ka'mo alu nofi vaya'mogi apakesa afi'a fatago hisayafe'mo kitamo ago yakino apate'niye, hu'ana hapa pai'na'ae. 28 Anakae'e ge'amo ne'afiya vaya'e'mo yatala afina'mo mai'nae.